我在大台短暫的日子
三，PA嘅「所有」職責 （上）

第三篇，講吓PA...

我在大台短暫的日子
三，PA嘅「所有」職責 （上）

第三篇，講吓PA有咩職責。因為PA工務繁多，我會分三篇講，上篇同中篇講Pre-production階段工作，而下篇就講拍攝階段工作。至於後製階段，因為我無親身經歷過，所有我冇乜可以分享。我見有唔少讀者原來都係同行或前輩，大家都可以分享一下；如果我講錯記錯啲乜，亦請指正！

未入職嘅時候，我聽到最多嘅「PA職責」係「帶住阿媽返工畀人問侯」，不過好慶幸，喺我短短嘅大台日子入面，我係完全無畀人問候過娘親，鬧都只係鬧過兩次（過兩篇先講到）。喺我嘅印象中，我接觸到嘅台前演員們同埋幕後所有工作人員都係算幾好人。就算最差都只係叫做Cool啲，唔多同你講野嗰隻，但未去到乞人憎/暴躁。當然，咁大間公司乜人都有。如果記得，幾年前都有單新聞提到大台有個導演超火爆，如果跟住佢，我諗帶晒全家連親戚去都唔夠用。

上回講到我係跟住Senior PA 做嘢，而佢可能未係好慣有條𡃁，而且時間好趕（套劇一個月就開），佢都唔多得閒分配野畀我做，所以我都係一路睇住黎學為主，落手落腳唔多。而我第一個叫做有份嘅Task，就係同成班導演組同事，同埋演員們喺大房嘅見面會。一對主角同埋頭三個單元嘅要角都上晒黎say 個hi，講句多多指教咁，無乜特別。反而開完會，監製同我地每組導演對一次劇本，工作就開始排山倒海咁黎。

對PA嚟講，籌備工作最重要嘅就係讀劇本，Study劇本。唔係研究佢寫得好唔好，而係研究晒成個劇本嘅每一場要拍嘅戲，因為你需要嘅所有資訊，都喺晒本劇本入面。TVB嘅劇本係一集一本，一個鐘（連廣告）嘅劇本大概40頁，而一集大約有20-25場戲。每場戲所寫嘅資料有：日夜、地點、演員(唔包老臨), 之後就係對白。從呢幾樣野所分析到嘅資料有： 日夜就知道拍攝時間，我地通常日間拍外景，天黑就拍廠景（真係將啲時間用到盡）；地點就進一步確認係外景定廠景：如果係外景，就要搵景（另有同事會幫手搵，但都係要同佢同導演夾）；如果係場地（即係電視台入面啲景，例如古裝街），就要睇有冇其他人用緊；如果係廠景，咁就唔使理故事發生係日定夜，都九成九係夜晚拍。同時，你已經可以大概將同一個廠景嘅戲（例如第2第8第13場都係主角寫字樓）安排一齊拍，咁就可以唔使同一個景搭咁多次。

之後，睇住每場戲所需要嘅演員，當然就係用黎夾時間。雖然主角理論上係100%畀晒自己嘅期喺套劇度，但係唔好唔記得一套劇有四組導演組，雖然會錯開，但有時都會撞，所以每組嘅PA要溝通好。另外，有啲配角可能出面有job，亦可能每逢星期一要拍綜藝/每個早上要電台開咪/同時拍緊幾套劇（特別係綠葉演員）等千萬個原因，所以有時候要夾同一場戲嘅所有演員絕對唔係易。

之後講埋劇本上嘅對白。對白對演員黎講固然好重要，但對PA黎講亦都係。我地唔係淨係用黎check 演員們有冇講錯野，而係喺籌備時畀PA睇到嗰場戲需要咩道具。譬如，劇本上寫咗一句：△謙拿起自己以前的成績表，不禁搖頭。咁你就知道，你要搵一份道具「成績表」，而且成績表上面好可能係攞好多個F。可能喺嗰場戲，又或者其他場口/集數有講主角讀邊間香城中學，咁仲要加個香城中學校徽上去。亦即係話，呢張成績表並唔係普通喺道具房有嘅道具房搵到嘅文件，而係要搵美術部同事幫手做（包括校徽設計）。

除咗劇本之外，公司係無其他文本會同PA講究竟每場戲有咩道具要準備，要著咩衫等等。份劇本因為唔係度身訂造寫畀PA睇，所以PA一定要自己睇到hints，而且逐場睇之餘仲要連繫埋上文下理，睇下有無咩有關聯嘅hints、使唔使連戲等等，冒求搵到/整到最合適、最唔會出錯嘅道具。

Identify晒所有野之後，就可以開始排Rundown。同導演、其他組導演PA、演員、場地等等夾好晒時間，就可以「對大簿」。「大簿」真係一本大簿黎，喺七樓最遠戲嘅角落。我嗰個年代係無電腦嘅，所以大家都寫完晒個Rundown，mark咗邊日喺邊度有邊啲台前幕後拍咩戲之後，就會拎呢張Rundown紙夾喺本大簿度，咁大家就可以用黎對有冇人撞時間。呢個工序係不能夠出錯的（但係會發生的SOSAD）。你以為你mark 好晒，點知後來臨拍先發現撞咗，咁嗰日變咗無得拍/無野拍，你變相成功為公司蝕幾十甚至上百萬，真係諗起都興奮。

搞掂Rundown之後，就開始落一系列嘅單。要拍到一場戲，所需嘅部門有梳化、服裝、道具、攝影燈光（外景先要Book）等。每個部門，只要你需要佢，你都要寫張單畀佢地。寫單究竟有幾煩有幾複雜？下回分解。

利申：以上都係好個人、好片面、好短暫，而且歷史久遠嘅經歷，並不代表所有PA嘅立場同經歷。

（圖片為n年前嘅一份Rundown）

---